جرى إيه هوه احنا عبيد؟ شعر / سمير الأمير

[سمير الأمير]

كتبت القصيدة فى مطلع 2007 ولم أجد من ينشرها حتى نشرتها جريدة الأهرام فى صباح يوم 11/1/2011 وهو اليوم الذى تنحى فيه الرئيس فسبقت القصيدة تنحيه بساعات، وقدر لها أن ترى النور فى الصحيفة التى ظل رئيس تحريرها يدافع عن نظام مبارك حتى اللحظة الأخيرة ولكن الكاتب الكبير / محمد البرغوثى أصر على نشرها فى ملحق الشباب الذى يحرره متحديا رئيس التحرير ورئيس الجمهورية. وإلى القصيدة:-
جرى إيه هوه احنا عبيد؟
شعر / سمير الأمير

****
جري إيه يا أخينا هوه احنا عبيد؟
هوه عرابي لسه مجاش
ولا قالشي الظلم ما يورثناش؟
ولا قال يا خديو متهددناش؟
محناش ناقصين تهديد
محناش ناقصين. إلزم حدك
محناش قيراطين من قراريط جدك
وإلا بيت مامتك وباباك يا غزيِّل
احنا الشعب اللي ساعات بينام ويقيِّل
لكن لما بيصحي عاديك
يطلعلك في ماسورة الميه
مهما تقفل في الشبابيك.
من باب الدم يخش عليك.
اعقل ولايمها الله يهديك
خليك جنب البيزنيس زي التاني
حافظ ع القرشين يا عبيط
ابعد عن كاني وعن ماني
نطاط الوهم ونطاط الحيط
النسل النمرود موصول الخيط
من عند معاوية لغاية بشار
ومن الحجاج لما لعلي عبدالله
افهم بقي!!
متاخدش كلامي هزار
البحر الأحمر مش حلة
والأبيض مش طشت غسيل
وبلدنا مش حتة أرضية
مكتوبة باسمك في وصية
بلدنا. بلدنا. لكل ولادنا
من عند قنالنا للسد
هبة الفلاح والنيل
مش ورث لحد
اسمعني المرة دي بجد.
خليك عاقل
وكفاية عليك قوي تبقي مدير
شركة تصدير الجرجير
أو بنك الصحراء والتعمير
إلزم حدك
شيل علي قدك
واوعي الغولة تزغلل ف عينيك وتشدك
تبنيك علشان تتفرج علي هدك
وتلم الدنيا عليك
بعد ما كانت ليك يا حزين
تصبح غلبان مسكين
تتمني ترجع تاني مجرد ابن
زيك زي ابن الفرعون القاتل
وابن الفرعون المقتول
الله يخرب بيت الظلم
ولاده كتير.
بس ولو
مهما تغيب الثورة
في عنينا بتغلي وتحلو
ادعيلها ربنا يهديها
سبيل الحق
وادعيلنا المولي يقدرنا
ونقولك لأ .

=======================================